Urco Editora: novo desenho de coleçom

Urco Editora leva quase 9 anos em activo a trazer para a língua galega títulos da fantasia, a ciência-ficçom e o terror clássicos (Lovecraft, Howard, Stocker, Irving, Poe…), bem como autoras autóctones da Galiza novas ou consagradas. Neste percurso, o desenho de coleçom foi variando e adaptando-se ás circunstâncias, tanto na criaçom de novos selos (Alcaián, Doutor Alveiros, Contos Estranhos, Xuvenil…) como na adaptaçom das coleçons existentes, que sofriram mais de uma anovaçom estética.

Embarcada numa nova etapa de expansom, com mais pessoas a trabalhar no projeto que amplia horizontes e diversifica as matérias e títulos oferecidos, Urco nom quer esquencer o que é a sua essência e origem: a coleçom de fantasia, ciência ficçom e terror traduzidas ao galego. Face ao décimo aniversário, pediu à Sacauntos a ré-invençom da coleçom, tendo presentes novas necessidades, como fundir as três sub-coleçons numa soa imagem, poder jogar com conteúdo fotográfico impactante, ou anovar e modernizar a estética clássica para marcar o novo ciclo.

Eis as provas — os protótipos que preparamos para verificar que o desenho, realmente, funcionava no objecto físico, numa janela duma livraria, etc:

DSC_0059

DSC_0080

DSC_0085

 



Preçadas amigas e amigos.

Desde a Sacauntos queremos comunicar-vos que estamos a tomar todas as medidas e acçons na nossa mao para cumprir com as recomendaçons e normas da OMS e as diferentes administraçons públicas.
Seguiremos com a nossa actividade sempre que a nossa segurança e a da nossa clientela nom se veja em risco, polo que queremos transmitir-vos uma mensagem de calma, tranquilidade e confiança.
Para ajudarmos a evitar a propagaçom da COVID-19, reunida a nossa assembleia a passada sexta-feira, decidimos tomar as seguintes medidas que afetam à nossa relaçom comercial convosco:

→ Enviar todos os trabalhos exclusivamente mediante serviço de transporte, evitando assim o contacto direto. Para facilitar isto, durante o tempo que dure a emergência, os envios por transportadora serám de balde.

→ Com esta mesma ideia de evitar o contacto físico, a nossa comunicaçom convosco realizará-se exclusivamente por telefone ou por correio eletrónico. As portas do nosso centro de trabalho ficarám fechadas para o público.

→ Os pagamentos serám exclusivamente mediante transferência bancária.

Ademais destas medidas, queremos comunicar-vos que pode que alguns trabalhos sofram atrasos ou aprazamentos. Tentaremos na medida do possível cumprir com as entregas regulares, mas som muitos os factores que influem na produçom (dependência de provedores de matéria prima, conciliaçom familiar das trabalhadoras etc.), polo que cabe a possibilidade de que alguns trabalhos devam ser adiados. Sempre que isto ocorra comunicaremos-nos convosco decontado para minimizar as consequências negativas que disto se possam derivar.

Muito obrigadas pola vossa compreensom.